By 
უკრაინის მოქალაქეები სამხედრო სავალდებულო სამსახურისგან თავის დაღწევას ცდილობენ
უკრაინის უსაფრთხოების სამსახურის (SBU) ინფორმაციით, გამოავლინეს და დაშალეს ადამიანთა კიდევ ერთი ჯგუფი, რომელიც მოქალაქეებს სამხედრო სავალდებულო სამსახურისთვის თავის არიდებასა და ქვეყნის დატოვებაში ეხმარებოდა. უკრაინას, რომელიც სამხედრო რიგების შევსებას ყველა ხერხით ცდილობს, ბრძოლის ველზე ცოცხალი ძალა აღარ ჰყოფნის.
დაკავებული ადამიანები იზმაილის პორტთან (ოდესის ოლქი) არიან დაკავშირებული. ჯგუფის წევრები იმ სამხედრო ასაკის მქონე პირებისგან იღებდნენ ქრთამს, რომლებსაც ქვეყნის დატოვება ჰქონდათ განზრახული.
დაკავებული პირები ქვეყნიდან გაქცევის მსურველებს სპეციალური დოკუმენტებით უზრუნველყოფდნენ, ვითომც ისინი სატვირთო გემების შტურმანები იყვნენ. ასეთი დოკუმენტის ღირებულება 700-დან 1,200 აშშ დოლარამდე მერყეობდა. დაკავებულებს ბრალად ედებათ 55 ათასი აშშ დოლარის აღება. სავარაუდოდ, ისინი ფაქტზე დააკავეს. მათ 10 წლამდე თავისუფლების აღკვეთა ემუქრებათ.
უკრაინის უსაფრთხოების სამსახურმა ოდესაში უკრაინის მართლმადიდებლური ეკლესიის დიაკვანიც დააკავა, რომელიც, როგორც ამბობენ, ზრდასრულ მამაკაცებს ქვეყნის დატოვებაში ეხმარებოდა, რომლებიც თითქოს ხელდასხმისთვის ემზადებოდნენ. თითოეული ადამიანი, სულ მცირე, 4,500 აშშ დოლარს იხდიდა. დიაკვანი დაკავებამდე ექვს ადამიანს დაეხმარა.
ჯარისკაცებით ფულის შოვნის კიდევ ერთი პოპულარული მეთოდი სამედიცინო მოწმობის გაცემაა, რომელიც ადასტურებს, რომ ფულის გადამხდელი სამხედრო სავალდებულო სამსახურისთვის უვარგისია. SBU-ს გამოვლენილი ჯგუფი ყოველდღიურად 20-მდე ასე მოწმობას გასცემდა, რომელთა ღირებულება 7 ათასიდან 10 ათას აშშ დოლარამდე მერყეობდა.
12 სექტემბერს პრეზიდენტმა ვოლოდიმირ ზელენსკიმ სპეციალური ბრძანებულება გამოსცა, რომლის თანახმადაც ყველა სამედიცინო ცნობა, რომელიც მამაკაცებს სამხედრო სავალდებულო სამსახურისგან ათავისუფლებს, იურიდიულად უნდა შემოწმდეს. ამ შემთხვევებს განიხილავენ და ამოქმედდება ახალი სამედიცინო ტესტები.
აგვისტოს მიწურულს უკრაინის არმიაში არსებული კორუფციის დამადასტურებელი ფაქტები გამოაშკარავდა, რის გამოც ოლექსი რეზნიკოვი თავდაცვის მინისტრის თანამდებობიდან გაათავისუფლეს. ბრალდებები შესყიდვების თემასა და იმ საბუთების გაცემას უკავშირდებოდა, რომელთა მეშვეობითაც უკრაინის მოქალაქეები სამხედრო სავალდებულო სამსახურს თავს არიდებდნენ.
