აშშ-ის საბანკო სისტემა ჩამოშლის პირასაა

ფედერალურმა სარეზერვო სისტემამ, ფინანსთა სამინისტრომ და ფედერალური დეპოზიტების დაზღვევის კორპორაციამ ბანკ „სილიკონ ველის“ გაკოტრების შემდეგ ბანკების მხარდამჭერი განცხადებები გააკეთეს
კვირას შეერთებული შტატების ფედერალური მთავრობა ქვეყნის საბანკო სისტემის მიმართ ნდობის დამტკიცებას ცდილობდა, როდესაც განაცხადა, რომ  ბანკ „სილიკონ ველის“ ყველა მეანაბრეს დაიცავს.
შეერთებული შტატების ფინანსთა მინისტრმა, ჯანეტ იელენმა, „სილიკონ ველის“ გაკოტრების დასარეგულირებლად მიღებული ღონისძიებები მოიწონა „იმგვარად, რომ სრულიად დაიცავს ყველა მეანაბრეს“, განაცხადა კვირას იელენმა ფედერალური სარეზერვო სისტემისა (Fed) და ფედერალური დეპოზიტების დაზღვევის კორპორაციის (FDIC) ერთობლივ განცხადებაში.
ეს იმას ნიშნავს, რომ FDIC-ის დაზღვევით 250 ათასი აშშ დოლარის ლიმიტის ზემოთ არსებული დეპოზიტები ორშაბათს იქნება ხელმისაწვდომი. ფინანსთა სამინისტროში აცხადებენ, რომ ეს ღონისძიებები გადასახადის გადამხდელებზე არ იმოქმედებს.
აშშ-ის ფინანსთა სამინისტროს, ფედერალური სარეზერვო სისტემისა და ფედერალური დეპოზიტების დაზღვევის კორპორაციის ერთობლივ განცხადებაში ფედერალურმა მთავრობამ განაცხადა: „დღეს გაბედულად უნდა ვიმოქმედოთ, რათა ჩვენი საბანკო სისტემის მიმართ საზოგადოების ნდობის გაძლიერებით შეერთებული შტატების ეკონომიკა დავიცვათ. ეს ნაბიჯი უზრუნველყოფს, რომ აშშ-ის საბანკო სისტემამ განაგრძობს თავისი სასიცოცხლო როლის შესრულება და დაიცვას დეპოზიტები და უზრუნველყოს შიდა მეურნეობისა და ბიზნესის კრედიტებზე წვდომა იმგვარად, რომ ხელი შეუწყოს ძლიერ და მდგრად ეკონომიკურ ზრდას. FDIC-ისა და ფედერალური სარეზერვო სისტემის მმართველი საბჭოებისგან რეკომენდაციის მიღებისა და პრეზიდენტთან კონსულტაციის შემდეგ მინისტრმა იელენმა მოიწონა ქმედებები, რომლებიც საშუალებას მისცემს FDIC-ს დაასრულოს თავისი რეზოლუცია ბანკ „სილიკონ ველთან“ მიმართებით, რომელიც კალიფორნიის შტატის ქალაქ სანტა კლარაში მდებარეობს, იმგვარად, რომ სრულიად დაიცვას ყველა მეანაბრე. მეანაბრეები მთელ ფულზე წვდომას ორშაბათიდან, 13 მარტიდან, შეძლებენ. „სილიკონ ველის“ რეზოლუციასთან დაკავშირებულ ზარალს გადასახადის გადამხდელი არ გადაიხდის.
ჩვენ ასევე ვაანონსებთ მსგავსი სისტემური რისკის გამონაკლისს ქალაქ ნიუ იორკში ბაზირებული „სიგნიჩა ბენქის“ (Signature Bank) მიმართ, რომელიც დღეს დახურა შტატის უფლებამოსილმა ორგანომ. ამ დაწესებულების ყველა მეანაბრეს ზარალი აუნაზღაურდება. როგორც „სილიკონ ველის“ შემთხვევაში, ზარალი გადასახადის გადამხდელს არ დაეკისრება.
აქციონერები და ზოგიერთი არაუზრუნველყოფილი მოვალე დაცული არ იქნება. თანამდებობები დაატოვებინეს ზემდგომ ხელმძღვანელებსაც. ნებისმიერი ზარალი ანაბრის დამზღვევი ფონდის მიმართ, რათა მხარი დაუჭირო დაუზღვეველ მეანაბრეებს, ანაზღაურდება ბანკის სპეციალური შეფასების შედეგად, ისე როგორც ამას კანონი მოითხოვს.
საბოლოოდ, კვირას ფედერალური სარეზერვო სისტემის დირექტორთა საბჭომ განაცხადა, რომ დამატებით დააფინანსებს უფლების მქონე სადეპოზიტო დაწესებულებებს, რათა დაეხმარნონ ბანკებს იმაში, რომ დაარწმუნონ, რომ შეძლებენ თავიანთი მეანაბრეების დაკმაყოფილებას.
აშშ-ის საბანკო სისტემა ინარჩუნებს მოქნილობას და აქვს მყარი საფუძველი, დიდწილად ფინანსური კრიზისის შემდეგ განხორციელებული რეფორმების გამო, რომლებიც  საბანკო ინდუსტრიის უკეთესად დაცვას უზრუნველყოფდნენ. ეს რეფორმები, რომლებიც დღევანდელ ქმედებებთან არის შეთავსებული, მიუთითებს ჩვენს ვალდებულებაზე, გადავდგათ აუცილებელი ნაბიჯები, რათა უსაფრთხოდ უზრუნველყოთ მეანაბრეთა დანაზოგები“.